"Eurovision-2010” mahnı müsabiqəsində Azərbaycanı təmsil edib 5-ci yeri qazanan Səfurə Əlizadə iyunun 7-də "Azad Azərbaycan” radiosunun qonağı oldu. Beş il ərzində İsveçdə yaşayacağını bildirən müğənni yaradıcılığı ilə bağlı həyata keçirəcəyi bütün planlarını eksklüziv olaraq show.az saytına danışdı: "İsveçdə ilk olaraq albomum işıq üzü görəcək. Həmçinin canlı instrumental qrupu ilə birgə konsert proqramı hazırlayacağıq. İsveçdə Azərbaycanı layiqincə təmsil edəcəyəm və hər bir uğurun altına azərbaycanlı müğənni kimi imza atacağam. Almaniyaya da səfərim var. Bu ölkədə albomun təqdimatı keçiriləcək. Daha sonra Bakıya gəlib, albomun tanıtımını edəcəyəm. Öz doğma vətənimdə də konsertim olacaq”.
Sən demə, "Eurovision-2010” mahnı müsabiqəsi başlayandan bu günə kimi xalq artisti Aygün Kazımova Səfurə Əlizadəyə dəstək olub: "Aygün xanım "Yeni ulduz” müsabiqəsində iştirak etdiyim zaman həmişə mənə "Sən mənim davamçım olacaqsan!” deyirdi. Sizin sayt vasitəsiylə Aygün xanıma təşəkkürümü bildirirəm”.